ဥပုသ်နေ့အကြောင်း ဆွေးနွေးခြင်း
6
ဥပုသ်နေ့တစ်နေ့တွင် ယေရှုသည် ဂျုံခင်းများကိုဖြတ်လျက် ကြွတော်မူစဉ် တပည့်တော်တို့က ဂျုံနှံများကိုခြွေဆွတ်၍ လက်နှင့်ချေကာ စားကြ၏။ 2 ထိုအခါ ဖာရိရှဲaတချို့က “သင်တို့သည် ပညတ်တရားအရ ဥပုသ်နေ့၌ မပြုသင့်သောအမှုကို အဘယ်ကြောင့် ပြုကြသနည်း” ဟု မေးကြ၏။3 ယေရှုက “ဒါဝိဒ်မင်းသည် မိမိနှင့်နောက်လိုက်များ ဆာလောင်သည့်အချိန်၌ မည်သို့ပြုခဲ့ကြောင်းကို သင်တို့မဖတ်ဖူးကြသလော။ 4 သူသည် ဘုရားသခင်၏အိမ်တော်အတွင်းသို့ ဝင်လျက် ယဇ်ပုရောဟိတ်များမှအပ အခြားမည်သူမျှ စားခွင့်မရှိသည့် သန့်ရှင်းသောမုန့်ကို ယူ၍ စား၏။ ထို့ပြင် သူ၏အပေါင်းအဖော်များကိုလည်း ပေး၏” ဟု မိန့်တော်မူ၏။ 5 ထို့နောက် ယေရှုက “လူသားbသည် ဥပုသ်နေ့၏အရှင်သခင်ဖြစ်သည်” ဟု မိန့်တော်မူ၏။
ဥပုသ်နေ့၌ ကျန်းမာစေတော်မူခြင်း
6 အခြားသောဥပုသ်နေ့တစ်နေ့တွင် ယေရှုသည် ဂျူးဝတ်ပြုဆောင်သို့ဝင်၍ သွန်သင်တော်မူ၏။ ထိုနေရာ၌ လက်ယာလက်သေသောသူတစ်ဦး ရှိ၏။ 7 ကျမ်းတတ်ဆရာများနှင့် ဖာရိရှဲတို့သည် ကိုယ်တော်ကို ပြစ်တင်စွပ်စွဲမည့်အခွင့် ရှာလိုသဖြင့် ကိုယ်တော်သည် ဥပုသ်နေ့တွင် အဆိုပါလူနာအားကုသမည်၊ မကုသမည်ကို စောင့်ကြည့်နေကြ၏။
8 ကိုယ်တော်သည် ထိုသူတို့၏တွေးတောကြံစည်မှုကို ကောင်းစွာသိတော်မူသော်လည်း လက်သေသောသူအား “ထလော့။ လူတို့ရှေ့ လာ၍ ရပ်လော့” ဟု မိန့်တော်မူ၏။ ထိုသူသည်လည်း ထ၍ရပ်လေ၏။ 9 ထို့နောက် ယေရှုက ကျမ်းတတ်ဆရာများနှင့် ဖာရိရှဲတို့အား “သင်တို့အား ငါမေးမည်။ ဥပုသ်နေ့တွင် ကောင်းမှုကို ပြုသင့်သလော။ သို့မဟုတ် မကောင်းမှုကို ပြုသင့်သလော။ လူ့အသက်ကို ကယ်သင့်သလော သို့မဟုတ် သတ်သင့်သလော” ဟု မိန့်တော်မူ၏။
10 ယေရှုသည် ထိုသူအားလုံးကို လှည့်ကြည့်ပြီးမှ လက်သေသောသူအား “သင်၏လက်ကို ဆန့်လော့” ဟု မိန့်တော်မူ၏။ သူသည် လက်ကိုဆန့်သောအခါ သူ၏လက်သည် အကောင်းပကတိအတိုင်း ဖြစ်လေ၏။ 11 ထိုအခါ သူတို့သည် လွန်စွာအမျက်ဒေါသထွက်ကာ ယေရှုနှင့်ပတ်သက်၍ မည်သို့ပြုရမည်ကို အချင်းချင်းတိုင်ပင်ကြ၏။
တမန်တော်ဆယ့်နှစ်ပါးကို ရွေးချယ်ခြင်း
12 ထိုနေ့ရက်များ၌ ကိုယ်တော်သည်ဆုတောင်းရန် တောင်ပေါ်သို့တက်ကြွတော်မူ၍ တစ်ညလုံးဘုရားသခင်ထံ ဆုတောင်းတော်မူ၏။ 13 နောက်တစ်နေ့ မိုးလင်းသောအခါ မိမိတပည့်တော်များကိုခေါ်၍ ထိုသူတို့ထဲမှ ဆယ့်နှစ်ဦးကို တမန်တော်အဖြစ် ရွေးချယ်တော်မူ၏။ ထိုသူတို့၏အမည်များမှာ
14 ပေတရုဟု ယေရှုမှည့်ခေါ်ထားသော ရှိမုန်၊
ပေတရု၏ညီ အန္ဒြေ၊
ယာကုပ်၊
ယောဟန်၊
ဖိလိပ္ပု၊
ဗာသောလမဲ၊
15 မဿဲ၊
သောမ၊
အာလဖဲ၏သား ယာကုပ်၊
မျိုးချစ်စိတ်ထက်သန်သူ ရှိမုန်၊
16 ယာကုပ်၏သားယုဒနှင့်
ယေရှုအား သစ္စာဖောက်သောယုဒရှကာရုတ်တို့ ဖြစ်ကြ၏။
ယေရှုနောက်တော်သို့ လူထုပရိသတ်လိုက်ခြင်း
17 ထို့နောက် ယေရှုသည် သူတို့နှင့်အတူ တောင်ပေါ်မှဆင်း၍ မြေပြန့်နေရာသို့ ရောက်သောအခါ ရပ်တော်မူ၏။ ထိုနေရာတွင် တပည့်တော်စုကြီးအပါအဝင် ယုဒပြည်နှင့် ဂျေရုဆလင်မြို့မှလည်းကောင်း၊ ပင်လယ်ကမ်းခြေရှိ တိုင်ရာမြို့နှင့် ဆီဒုန်မြို့တို့မှလည်းကောင်း ရောက်လာကြသော လူအမြောက်အမြားရှိ၏။ 18 ထိုသူတို့သည် ယေရှု၏ဟောပြောသွန်သင်မှုကို ကြားနာရန်နှင့် မိမိတို့၏အနာရောဂါများကို ကုသခံရန် ရောက်လာကြခြင်း ဖြစ်၏။ နတ်ဆိုးတို့၏ညှဉ်းဆဲခြင်းခံရသောသူတို့သည်လည်း လာ၍ အကောင်းပကတိအတိုင်း ဖြစ်သွားကြ၏။ 19 ယေရှုထံမှ တန်ခိုးထွက်၍ လူတို့ကို အနာရောဂါများမှ ကျန်းမာစေသောကြောင့် လူထုအပေါင်းတို့သည် ယေရှုကို တို့ထိရန် ကြိုးစားကြ၏။
မင်္ဂလာတရားတော်
20 ထို့နောက် ယေရှုသည် သူ၏တပည့်တော်များဘက်သို့ လှည့်၍ မိန့်တော်မူသည်မှာ
“ဆင်းရဲသောသင်တို့သည် မင်္ဂလာရှိကြ၏။
အဘယ်ကြောင့်ဆိုသော် ဘုရားသခင်၏နိုင်ငံတော်သည် သင်တို့၏နိုင်ငံ ဖြစ်သောကြောင့်ပင်။
21 ယခု ဆာလောင်မွတ်သိပ်နေသောသင်တို့သည် မင်္ဂလာရှိကြ၏။
အဘယ်ကြောင့်ဆိုသော် သင်တို့သည် ဝလင်စွာ စားရသောအခွင့်ကို ရကြမည်ဖြစ်သောကြောင့်ပင်။
ယခုငိုကြွေးဝမ်းနည်းသောသင်တို့သည် မင်္ဂလာရှိကြ၏။
အဘယ်ကြောင့်ဆိုသော် သင်တို့ရယ်မောရသောအချိန်သည် ရောက်လာမည်ဖြစ်သောကြောင့်ပင်။
22 လူတို့သည် လူသားကြောင့် သင်တို့ကို မုန်းကြ၍ ဝိုင်းပယ်ကဲ့ရဲ့လျက် သင်တို့၏နာမည်ကို ဖျက်ကြသောအခါ၌လည်း သင်တို့သည် မင်္ဂလာရှိကြ၏။ 23 ထိုသို့ဖြစ်ပေါ်သောနေ့ရက် ရောက်သောအခါ ဝမ်းမြောက်၍ ရွှင်လန်းစွာ ကခုန်ကြလော့။ အဘယ်ကြောင့်ဆိုသော် ကောင်းကင်ဘုံတွင်ရရှိမည့် သင်တို့၏ဆုလာဘ်သည် ကြီးမားလှသောကြောင့်ဖြစ်၏။ သင်တို့ကို မတရားပြုကျင့်သော ထိုသူတို့၏ဘိုးဘေးများသည်လည်း ပရောဖက်တို့ကို ထိုနည်းတူပြုကြ၏။
ဝမ်းနည်းခြင်းအကြောင်း ဟောတော်မူခြင်း
24 သို့ရာတွင် ချမ်းသာသောသင်တို့သည် အမင်္ဂလာရှိကြ၏။
အဘယ်ကြောင့်ဆိုသော် သင်တို့သည် မိမိတို့ခံစားရမည့် နှစ်သိမ့်မှုကို ရရှိပြီးဖြစ်သောကြောင့်ပင်။
25 ယခု ဝလင်စွာစားရသောသင်တို့သည် အမင်္ဂလာရှိကြ၏။
အဘယ်ကြောင့်ဆိုသော် သင်တို့သည် ဆာလောင်ငတ်မွတ်ရမည့်အချိန်ကာလ ရောက်လာမည်ဖြစ်သောကြောင့်ပင်။
ယခုရယ်မောသောသင်တို့သည် အမင်္ဂလာရှိကြ၏။
အဘယ်ကြောင့်ဆိုသော် သင်တို့သည် ဝမ်းနည်းငိုကြွေးရမည်ဖြစ်သောကြောင့်ပင်။
26 လူတို့သည် သင်တို့ကို ချီးမွမ်းကြသောအခါ သင်တို့သည် အမင်္ဂလာရှိကြ၏။
အဘယ်ကြောင့်ဆိုသော် ထိုသူတို့၏ဘိုးဘေးများသည် ပရောဖက်အတုအယောင်များကို ထိုနည်းတူချီးမွမ်းခဲ့ကြသောကြောင့်ဖြစ်၏။
ရန်သူအပေါ် ချစ်ခြင်းမေတ္တာထားခြင်း
27 သို့သော် ယခုနားထောင်နေကြသော သင်တို့အား ငါပြောဆိုသည်မှာ သင်တို့၏ရန်သူများကို ချစ်လော့။ သင်တို့ကို မုန်းသောသူတို့အား ကောင်းမွန်စွာဆက်ဆံကြလော့။ 28 သင်တို့ကို ကျိန်ဆဲသောသူတို့အတွက် ဆုတောင်းမေတ္တာပို့ကြလော့။ သင်တို့ကို နိုင်ထက်စီးနင်းပြုသောသူတို့အတွက် ဆုတောင်းပေးကြလော့။ 29 တစ်စုံတစ်ယောက်က သင်၏ပါးတစ်ဖက်ကို ရိုက်လျှင် ကျန်သည့်ပါးတစ်ဖက်ကိုလည်း ရိုက်ခွင့်ပေးလော့။ သင်၏ဝတ်ရုံကို ယူသောသူအား အတွင်းအင်္ကျီကိုပါ ပေးလော့။ 30 သင့်ထံမှ တောင်းသောသူတို့အား ပေးကမ်းလော့။ သင့်ပစ္စည်းများကို ယူသောသူတို့ထံမှ ပြန်၍ မတောင်းနှင့်။ 31 သင်တို့အပေါ် ပြုစေလိုသည့်အတိုင်း တစ်ပါးသူတို့အပေါ် ပြုကြလော့။
32 သင်တို့အား ချစ်သောသူတို့ကိုသာ ပြန်၍ချစ်လျှင် မည်သည့်ဂုဏ်ယူစရာ ရှိသနည်း။ အဘယ်ကြောင့်ဆိုသော် အပြစ်သားတို့ပင်လျှင် မိမိတို့အား ချစ်သောသူတို့ကို ချစ်ကြသောကြောင့်ဖြစ်၏။ 33 သင်တို့အား ကောင်းကျိုးပြုသောသူတို့ကိုသာ ပြန်၍ အကျိုးပြုလျှင် မည်သည့်ဂုဏ်ယူစရာ ရှိသနည်း။ အဘယ်ကြောင့်ဆိုသော် အပြစ်သားတို့ပင်လျှင် ထိုသို့ပြုကြ၏။ 34 သင်တို့အား ပြန်ဆပ်ပေးနိုင်မည်ဟု မျှော်လင့်စရာရှိသောသူတို့ကိုသာ ချေးငှားလျှင် မည်သည့်ဂုဏ်ယူစရာရှိမည်နည်း။ အပြစ်သားတို့ပင်လျှင် ပြန်ဆပ်ပေးမည်ဟု မျှော်လင့်၍ အချင်းချင်းထိုသို့ချေးငှားကြ၏။
35 သို့သော် သင်တို့သည် ရန်သူများကို ချစ်လော့။ သူတို့အားကောင်းကျိုးပြုလော့။ တစ်စုံတစ်ရာကို ပြန်လည်ရရှိမည်ဟု မမျှော်လင့်ဘဲ ချေးငှားလော့။ ထိုသို့ပြုလျှင် ကောင်းကင်ဘုံမှ ရရှိမည့် သင်တို့၏ဆုလာဘ်သည် ကြီးမား၍ သင်တို့သည်လည်း အမြင့်မြတ်ဆုံးသော ဘုရားသခင်၏သားသမီးများ ဖြစ်ကြလိမ့်မည်။ အဘယ်ကြောင့်ဆိုသော် ဘုရားသခင်သည် ကျေးဇူးကန်းသောသူများနှင့် ဆိုးသွမ်းသောသူများကို သနားကြင်နာတော်မူသောကြောင့်ဖြစ်၏။ 36 သင်တို့၏အဖသည် သနားကြင်နာတော်မူသည့်အတိုင်း သင်တို့သည်လည်း သနားကြင်နာကြလော့။
သူတစ်ပါးအား အပြစ်စီရင်ခြင်း
37 တစ်ပါးသူတို့ကို အပြစ်မစီရင်ကြနှင့်။ သို့မှသာ သင်တို့သည်လည်း အပြစ်စီရင်ခံရခြင်းမှ လွတ်လိမ့်မည်။ တစ်ပါးသူတို့ကို မဝေဖန်ကြနှင့်။ သို့မှသာ သင်တို့သည်လည်း ဝေဖန်ခံရခြင်းမှ လွတ်လိမ့်မည်။ တစ်ပါးသူတို့ကို ခွင့်လွှတ်ကြလော့။ သို့မှသာ သင်တို့သည် ခွင့်လွှတ်ခြင်းကို ခံရလိမ့်မည်။ 38 ပေးကမ်းကြလော့။ ထိုသို့ပြုလျှင် သင်တို့သည်လည်း ပေးကမ်းခြင်းခံရလိမ့်မည်။ ပြည့်ရုံမက ပိုလျှံသည့်တိုင်အောင် သင်တို့အား ပေးကမ်းကြလိမ့်မည်။ သင်တို့ချိန်တွယ်ပေးသည့် ပမာဏအတိုင်း သင်တို့အား တိုင်းတာချိန်တွယ်ပေးကြလိမ့်မည်” ဟူ၍ ဖြစ်၏။
39 ထို့နောက် ယေရှုသည် သူတို့အား ပုံဥပမာပေး၍ မိန့်တော်မူသည်မှာ “မျက်မမြင်တစ်ဦးသည် အခြားမျက်မမြင်တစ်ဦးအား လမ်းပြနိုင်သလော။ ထိုသို့ပြုလျှင် ထိုသူနှစ်ဦးလုံး တွင်းထဲသို့ ကျလိမ့်မည် မဟုတ်လော။ 40 တပည့်သည် ဆရာထက် မြတ်သည်မဟုတ်။ သို့သော်လည်း ကောင်းမွန်စွာလေ့ကျင့်သင်ကြားခြင်းကို ခံယူသောသူတိုင်းသည် မိမိဆရာကဲ့သို့ ဖြစ်လိမ့်မည်။
41 သင်သည် သင့်မျက်စိထဲက သစ်တုံးကို မမြင်ဘဲ သင့်မိတ်ဆွေc၏မျက်စိထဲက သစ်မှုန်စကို အဘယ်ကြောင့် မြင်သနည်း။ 42 သင်၏မျက်စိထဲက သစ်တုံးကို မမြင်နိုင်ဘဲ ‘မိတ်ဆွေ… သင့်မျက်စိထဲက သစ်မှုန်စကို ထုတ်ပေးပါရစေ’ ဟူ၍ သင့်မိတ်ဆွေအား အဘယ်ကြောင့်ပြောရသနည်း။ သူတော်ကောင်းယောင်ဆောင်သူ… သင်၏မျက်စိထဲက သစ်တုံးကို ဦးစွာထုတ်ပစ်လော့။ သို့မှသာ သင့်မိတ်ဆွေ၏မျက်စိထဲက သစ်မှုန်စကို ထုတ်ရန် ရှင်းလင်းစွာ မြင်ရလိမ့်မည်။
အပင်နှင့် အသီး
43 ကောင်းသောအပင်သည် မကောင်းသောအသီးကို မသီးနိုင်။ မကောင်းသောအပင်သည်လည်း ကောင်းသောအသီးကို မသီးနိုင်။ 44 အသီးအားဖြင့် အပင်အကြောင်းကို သိရ၏။ အဘယ်ကြောင့်ဆိုသော် သဖန်းသီးကို ဆူးပင်မှ မဆွတ်ခူးနိုင်။ စပျစ်သီးကို ဆူးခြုံမှ မဆွတ်ခူးနိုင်။ 45 ကောင်းသောသူသည် ကောင်းသောအရာများကို ကောင်းသောစိတ်နှလုံးဘဏ္ဍာတိုက်အတွင်းမှ ထုတ်ဖော်တတ်၏။ မကောင်းသောသူသည်လည်း မကောင်းသောအရာများကို မကောင်းသောစိတ်နှလုံးဘဏ္ဍာတိုက်အတွင်းမှ ထုတ်ဖော်တတ်၏။ အဘယ်ကြောင့်ဆိုသော် စိတ်နှလုံးထဲတွင် ပြည့်နေသည့်အရာများကို နှုတ်မှပြောဆိုတတ်သောကြောင့်ဖြစ်၏။
ခိုင်ခံ့သောအုတ်မြစ်ပေါ်တွင် တည်ဆောက်ခြင်း
46 သင်တို့သည် ငါ့စကားကို နားမထောင်ဘဲ အဘယ်ကြောင့် ငါ့ကို ‘သခင်… သခင်…’ ဟု ခေါ်ကြသနည်း။ 47 ငါ့ထံသို့လာ၍ ငါ့တရားစကားကို ကြားနာလျက် လက်တွေ့ကျင့်သုံးသောသူတိုင်း မည်သူနှင့် တူသည်ကို သင်တို့အား ငါပြောမည်။ 48 ထိုသူသည် နက်စွာတူးကာ ခိုင်မာသောအုတ်မြစ်ကို ကျောက်ပေါ်၌ချ၍ အိမ်ဆောက်သောသူနှင့် တူ၏။ ထိုအိမ်ကို ခိုင်ခံ့စွာ တည်ဆောက်ထားသဖြင့် ရေကြီးသောအခါ မြစ်ရေသည် အိမ်ကိုရိုက်ခတ်လာသော်လည်း မလှုပ်စေနိုင်ပါ။ 49 သို့သော် ငါ့တရားစကားကို ကြား၍ လက်တွေ့မကျင့်သုံးသောသူသည် အုတ်မြစ်မချဘဲ မြေကြီးပေါ်တွင် အိမ်ဆောက်သောသူနှင့် တူ၏။ ရေကြီး၍ မြစ်ရေသည် ထိုအိမ်ကို ရိုက်ခတ်သောအခါ ချက်ချင်းပြိုကျသွား၏။ ထိုအိမ်၏ပျက်စီးမူသည်လည်း ကြီးမားလေ၏” ဟူ၍ ဖြစ်၏။