အခြားဘာသာစကားပြောခြင်းနှင့် ပရောဖက်ပြုဟောပြောခြင်း
14
ချစ်ခြင်းမေတ္တာတရားကို ကြိုးစား၍ ကျင့်သုံးကြလော့။ ဝိညာဉ်ဆုကျေးဇူးများကိုလည်း အလွန်လိုချင်သောစိတ် ရှိကြလော့။ အထူးသဖြင့် ပရောဖက်ပြုဟောပြောနိုင်သောဆုကျေးဇူးကို လိုချင်သောစိတ် ရှိကြလော့။ 2 အဘယ်ကြောင့်ဆိုသော် အခြားဘာသာစကားကို ပြောဆိုသူသည် လူတို့အား ပြောဆိုသည်မဟုတ်။ ဘုရားသခင်အား ပြောဆိုခြင်းဖြစ်၏။ ထိုသူပြောသောစကားကို မည်သူမျှ နားမလည်ပေ။ သူသည် ဝိညာဉ်တော်၏တန်ခိုးအားဖြင့် လျှို့ဝှက်နက်နဲသောအရာတို့ကို ပြောဆိုနေခြင်းဖြစ်၏။ 3 ပရောဖက်ပြုဟောပြောသောသူကမူ လူတို့အား ဆောက်တည်စရာစကား၊ အားပေးစကား၊ နှစ်သိမ့်စကားတို့ကို ဟောပြော၏။ 4 အခြားဘာသာစကားကို ပြောသောသူသည် မိမိကိုယ်ကိုယ် တည်ဆောက်၏။ ပရောဖက်ပြုဟောပြောသောသူကမူ အသင်းတော်တစ်ခုလုံးကို တည်ဆောက်ပေး၏။5 ကျွန်ုပ်သည် သင်တို့ရှိသမျှအား အခြားဘာသာစကားကို ပြောတတ်စေလို၏။ သို့သော် ပရောဖက်ပြုဟောပြောခြင်းကို ပို၍ တတ်စေလို၏။ အဘယ်ကြောင့်ဆိုသော် အခြားဘာသာစကားကို ပြောဆိုရာတွင် အသင်းတော်အတွက် တည်ဆောက်စရာဖြစ်စေရန် အနက်ကို ပြန်နိုင်ရမည်ဖြစ်၏။ အနက်မပြန်နိုင်လျှင် အခြားဘာသာစကားကို ပြောဆိုခြင်းထက် ပရောဖက်ပြုဟောပြောခြင်းသည် ပို၍ မြတ်၏။
6 ညီအစ်ကိုမောင်နှမတို့… ကျွန်ုပ်သည် သင်တို့ထံသို့ လာ၍ သင်တို့နားမလည်သော အခြားဘာသာစကားဖြင့် ပြောဆိုသော်လည်း ဗျာဒိတ်တော်ဖွင့်ပြခြင်း၊ အသိပညာမျှဝေခြင်း၊ ပရောဖက်ပြုခြင်း၊ သင်ကြားခြင်းတို့ဖြင့် မပြောဆိုလျှင် သင်တို့အတွက် မည်သည့်အကျိုးရှိမည်နည်း။ 7 ပလွေ၊ စောင်းကဲ့သို့သော သက်မဲ့တူရိယာများပင်လျှင် ရှင်းလင်းပြတ်သားသော သံစဉ်မထွက်ပါက မည်သည့်တီးလုံး တီးမှုတ်နေသည်ကို မည်သို့သိနိုင်မည်နည်း။ 8 တံပိုးခရာသည်လည်း ရှင်းလင်းပြတ်သားသောအသံမထွက်လျှင် စစ်တိုက်ရန် ခေါ်ကြောင်း စစ်သားများက မည်သို့သိမည်နည်း။
9 သင်တို့သည် တစ်စုံတစ်ယောက်အား ထိုသူ နားမလည်နိုင်သောအခြားဘာသာစကားဖြင့် ပြောဆိုလျှင် သင်တို့ဆိုလိုသောအရာကို သူသည် မည်သို့သိနိုင်မည်နည်း။ လေအား ပြောလိုက်သကဲ့သို့သာ ဖြစ်လိမ့်မည်။
10 ကမ္ဘာပေါ်တွင် မတူညီသော ဘာသာစကားပေါင်းများစွာ ရှိသော်လည်း အဓိပ္ပာယ်မဲ့သော ဘာသာစကားဟူ၍ မရှိပါ။ 11 အကယ်၍ တစ်စုံတစ်ယောက်ပြောသော ဘာသာစကားကို ကျွန်ုပ်နားမလည်လျှင် ထိုသူသည် ကျွန်ုပ်အတွက် လူမျိုးကွဲဖြစ်ပြီး ကျွန်ုပ်သည်လည်း ထိုသူအတွက် လူမျိုးကွဲဖြစ်လိမ့်မည်။ 12 သို့ဖြစ်၍ သင်တို့သည်လည်း ဝိညာဉ်ဆုကျေးဇူးများကို ရရန် စိတ်အားထက်သန်သည့်အလျောက် အသင်းတော်ကို တည်ဆောက်ရာတွင် အကျိုးပြုမည့် ဆုကျေးဇူးများကိုသာ ရရန် ကြိုးစားကြလော့။
13 ထို့ကြောင့် အခြားဘာသာစကားကို ပြောဆိုသောသူသည် မိမိပြောသောစကားတို့ကို အနက်ပြန်နိုင်ရန်အတွက်လည်း ဆုတောင်းသင့်၏။ 14 အဘယ်ကြောင့်ဆိုသော် ကျွန်ုပ်သည် အခြားဘာသာစကားအားဖြင့် ဆုတောင်းလျှင် ကျွန်ုပ်၏ စိတ်ဝိညာဉ်သည် ဆုတောင်းနေသော်လည်း ကျွန်ုပ်၏ အသိဉာဏ်အတွက် အကျိုးမရှိ။
15 ထိုသို့ဆိုလျှင် မည်သို့ပြုရမည်နည်း။ ကျွန်ုပ်သည် စိတ်ဝိညာဉ်နှင့် ဆုတောင်းမည်။ အသိဉာဏ်နှင့်လည်း ဆုတောင်းမည်။ စိတ်ဝိညာဉ်နှင့် သီချင်းဆိုမည်။ အသိဉာဏ်နှင့်လည်း သီချင်းဆိုမည်။ 16 အဘယ်ကြောင့်ဆိုသော် သင်သည် စိတ်ဝိညာဉ်နှင့် ဘုရားသခင်ကို ချီးမွမ်းလျှင် အကျွမ်းတဝင်မရှိသေးသောလူတစ်ယောက်သည် သင်ပြောနေသောစကားကို နားမလည်သောကြောင့် ဘုရားသခင်အား သင်ကျေးဇူးတင်သည်ကို အာမင်ဟု မည်သို့ ဝန်ခံပြောဆိုနိုင်မည်နည်း။ 17 သင်သည် ဘုရားသခင်အား ကောင်းစွာ ကျေးဇူးတင်နေသော်လည်း တစ်ပါးသူအတွက် တည်ဆောက်စရာမဖြစ်ပေ။
18 ကျွန်ုပ်သည် အခြားဘာသာစကားကို သင်တို့ထက်ပို၍ ပြောဆိုရသောကြောင့် ဘုရားသခင်ကို ကျေးဇူးတင်၏။ 19 သို့ဖြစ်စေကာမူ အသင်းတော်တွင် အခြားဘာသာစကားဖြင့် အခွန်းတစ်သောင်းကို ပြောဆိုသည်ထက် တစ်ပါးသူကို သွန်သင်ရန် နားလည်နိုင်သောစကားငါးခွန်းကိုသာ ကျွန်ုပ်ပြောဆိုမည်။
20 ချစ်သော ညီအစ်ကိုမောင်နှမတို့… ကလေးဆန်စွာ မတွေးခေါ်ကြနှင့်။ မကောင်းမှုနှင့်ပတ်သက်လျှင် ကလေးငယ်ကဲ့သို့ ဖြစ်၍ စဉ်းစားတွေးခေါ်မှုနှင့်ပတ်သက်လျှင် ရင့်ကျက်သောသူများကဲ့သို့ ဖြစ်ကြလော့။ 21 ကျမ်းစာ၌
“ငါသည် ဤလူမျိုးတို့အား ပြောရန် အခြားနိုင်ငံမှ လူတို့ကို အသုံးပြုမည်။
ထိုသူတို့သည် အခြားဘာသာစကားများဖြင့် ပြောဆိုကြလိမ့်မည်။
သို့သော်လည်း သူတို့သည် ငါ့ကို နားထောင်ကြလိမ့်မည်မဟုတ် ဟု ထာဝရဘုရားမိန့်တော်မူ၏”a
ဟူ၍ ရေးသားထား၏။
22 သို့ဖြစ်၍ အခြားဘာသာစကားသည် ယုံကြည်သူများအတွက် နိမိတ်လက္ခဏာမဟုတ်ဘဲ မယုံကြည်သူများအတွက်သာ ဖြစ်၏။ ပရောဖက်ပြုဟောပြောခြင်းမှာမူ မယုံကြည်သူများအတွက် မဟုတ်ဘဲ ယုံကြည်သူများအတွက်ဖြစ်၏။ 23 ထို့ကြောင့် အသင်းတော်တစ်ခုလုံးစုဝေး၍ အခြားဘာသာစကားများဖြင့် ပြောဆိုနေကြစဉ် အကျွမ်းတဝင်မရှိသေးသောသူများနှင့် မယုံကြည်သူများ ဝင်လာလျှင် သင်တို့ကို ရူးနေကြပြီဟု ပြောကြမည်မဟုတ်လော။ 24 သို့သော် သင်တို့ရှိသမျှသည် ပရောဖက်ပြုဟောပြောနေကြစဉ် အကျွမ်းတဝင်မရှိသေးသောသူများနှင့် မယုံကြည်သူများ ဝင်လာလျှင် သင်တို့၏ဟောပြောချက်အားဖြင့် သူတို့က မိမိတို့သည် အပြစ်ရှိသူများဖြစ်ကြောင်းနှင့် စစ်ဆေးစီရင်ခြင်းကို ခံရမည်ဖြစ်ကြောင်း သိမြင်လာကြလိမ့်မည်။ 25 သူတို့၏ စိတ်နှလုံးထဲမှ လျှို့ဝှက်သောအတွေးအခေါ်များသည် ပေါ်လွင်လာသဖြင့် သူတို့သည် ဝပ်တွားခယကာ “ဘုရားသခင်သည် သင်တို့နှင့်အတူ အမှန်တကယ်ရှိတော်မူ၏” ဟု ကြွေးကြော်လျက် ဘုရားသခင်ကို ကိုးကွယ်ကြလိမ့်မည်။
အစီအစဉ်တကျ ဝတ်ပြုကိုးကွယ်ခြင်း
26 သို့ဖြစ်လျှင် ညီအစ်ကိုမောင်နှမတို့… ကျွန်ုပ်ဆိုလိုသည်မှာ ဤသို့ဖြစ်၏။ သင်တို့စုဝေးကြသောအခါ တစ်ဦး က ဓမ္မသီချင်းဆိုခြင်း၊ တစ်ဦးက သင်ကြားခြင်း၊ တစ်ဦးက ဗျာဒိတ်တော်ကို ဖွင့်ပြခြင်း၊ တစ်ဦးက အခြားဘာသာစကားကို ပြောခြင်းနှင့် တစ်ဦးက ထိုဘာသာစကားကို အနက်ပြန်ခြင်းဟူ၍ အသီးသီးဆောင်ရွက်ကြ၏။ ထိုအခြင်းအရာအားလုံးကို သင်တို့လုပ်ဆောင်ရာတွင် အသင်းတော် တည်ဆောက်စရာအတွက် ဖြစ်စေကြလော့။
27 အခြားဘာသာစကားဖြင့် ပြောမည်ဆိုပါက နှစ်ဦး သို့မဟုတ် သုံးဦးထက်ပို၍ မပြောသင့်ပေ။ သူတို့သည် တလှည့်စီပြော၍ သူတို့ပြောဆိုသောစကားကို တစ်ယောက်က အနက်ပြန်ပေးရမည်။ 28 သို့သော် အနက်ပြန်နိုင်မည့်သူ မရှိလျှင် ထိုသူတို့သည် အသင်းတော်စုဝေးရာ၌ တိတ်ဆိတ်စွာ နေ၍ စိတ်ထဲ၌သာ ဘုရားသခင်ကို ပြောဆိုရမည်။
29 ပရောဖက်နှစ်ဦး သို့မဟုတ် သုံးဦးက ဟောပြော၍ ထိုဟောပြောသောအရာကို အခြားသောသူတို့သည် အကဲဖြတ်သုံးသပ်ကြစေ။ 30 သို့သော် ထိုင်နေသောသူတို့ထဲမှ တစ်ယောက်သည် ဗျာဒိတ်တော်ကို ရရှိလျှင် ပရောဖက်ပြုဟောပြောနေသောသူသည် တိတ်ဆိတ်စွာနေရမည်။ 31 လူတိုင်း သင်ယူရပြီး လူတိုင်း အားပေးခံရနိုင်ရန် ပရောဖက်ပြုသောသူအားလုံးသည် တစ်လှည့်စီ ပရောဖက်ပြုဟောပြောကြရမည်။ 32 ပရောဖက်တို့သည် မိမိတို့၏ စိတ်ဝိညာဉ်ကို ချုပ်ထိန်းနိုင်ကြ၏။ 33 အဘယ်ကြောင့်ဆိုသော် ဘုရားသခင်သည် ယောက်ယက်ခတ်စေတတ်သောဘုရားမဟုတ်ဘဲ ယုံကြည်သူတို့b၏ အသင်းတော်များ၌ ပြုသကဲ့သို့ ငြိမ်းချမ်းခြင်းကို ဖြစ်စေသောဘုရား ဖြစ်တော်မူသောကြောင့်ပင်။ 34 အမျိုးသမီးများသည် အသင်းတော်တွင် တိတ်ဆိတ်စွာ နေကြရမည်။ သူတို့တွင် ပြောဆိုခွင့်မရှိ။ ပညတ်တရားတွင် ဆိုထားသည့်အတိုင်း သူတို့သည် နာခံမှုရှိကြရမည်။ 35 သူတို့သည် တစ်စုံတစ်ခုကို သိလိုလျှင် အိမ်၌ မိမိခင်ပွန်းကို မေးမြန်းကြစေ။ အဘယ်ကြောင့်ဆိုသော် အမျိုးသမီးများအနေဖြင့် အသင်းတော်တွင် ပြောဆိုခြင်းသည် မသင့်လျော်သောကြောင့်ဖြစ်၏။
36 ဘုရားသခင်၏ နှုတ်ကပတ်တော်သည် သင်တို့ထံမှ ထွက်လာသလော။ သင်တို့အတွက်သာ ပေးထားသလော။ 37 တစ်စုံတစ်ယောက်သည် မိမိကိုယ်ကိုယ် ပရောဖက်ဖြစ်သည် သို့မဟုတ် ဝိညာဉ်ဆုကျေးဇူးရရှိသူဖြစ်သည်ဟု ယူဆလျှင် သင်တို့ထံသို့ ကျွန်ုပ်ရေးလိုက်သော အကြောင်းအရာတို့သည် သခင်ဘုရား၏ ပညတ်တော်ဖြစ်ကြောင်း သိမှတ်ရမည်။ 38 ဤအကြောင်းအရာကို မသိမှတ်လျှင် ထိုသူသည်လည်း အသိအမှတ်ပြုခံရမည်မဟုတ်ပေ။c