6
ဘုရားသခင်၏ လုပ်ဖော်ကိုင်ဖက်များအနေဖြင့် သင်တို့အား ကျွန်ုပ်တို့တိုက်တွန်းနှိုးဆော်လိုသည်မှာ “သင်တို့သည် ဘုရားသခင်၏ ကျေးဇူးတော်ကို ခံစားရရှိသူများဖြစ်ကြသည်နှင့်အညီ ထိုကျေးဇူးတော်ကို အချည်းနှီးမဖြစ်စေကြနှင့်” ဟူ၍ဖြစ်၏။ 2 အဘယ်ကြောင့်ဆိုသော် ဘုရားသခင်က“ငါသည် ကျေးဇူးပြုရန် သင့်လျော်သောအချိန်၌ သင့်စကားကို နားထောင်ခဲ့ပြီ။
ကယ်တင်သောနေ့ရက်၌ သင့်ကို ကူညီမစခဲ့ပြီ”
ဟု မိန့်တော်မူခဲ့၏။ ယခုအချိန်သည် ကိုယ်တော်၏ကျေးဇူးပြုတော်မူခြင်းကို ခံစားရမည့်အချိန်ပင် ဖြစ်၏။ ယခုအချိန်သည် ကယ်တင်တော်မူရာနေ့ရက်ပင် ဖြစ်၏။
ပေါလု၏ ဆင်းရဲဒုက္ခများ
3 အမှုတော်လုပ်ငန်းတွင် အပြစ်တင်စရာအကြောင်း တစ်စုံတစ်ခုမျှ မရှိစေရန် ကျွန်ုပ်တို့သည် သူတစ်ပါးရှေ့၌ ထိမိ၍ လဲစရာမဖြစ်စေကြ။ 4 ထိုသို့ဖြစ်စေမည့်အစား ကျွန်ုပ်တို့သည် ဆင်းရဲဒုက္ခများ၊ အကျပ်အတည်းများ၊ အခက်အခဲများကို အလွန်သည်းခံလျက် ဘုရားသခင်၏ အစေခံများဖြစ်ကြောင်းကိုသာ ပေါ်လွင်စေကြ၏။ 5 ရိုက်နှက်ခံရခြင်း၊ ထောင်ကျခြင်း၊ ရုန်းရင်းဆန်ခတ်ပြုလုပ်ခံရခြင်း၊ အလုပ်ပင်ပန်းခြင်း၊ အိပ်ရေးပျက်ခြင်း၊ အစာပြတ်လပ်ခြင်းတို့ကို သည်းခံကြ၏။ 6 ဖြူစင်ခြင်း၊ အသိပညာရှိခြင်း၊ စိတ်ရှည်ခြင်းနှင့် ကျေးဇူးပြုခြင်းတို့ဖြင့်လည်းကောင်း၊ သန့်ရှင်းသောဝိညာဉ်တော်ကို နာခံခြင်း၊ စစ်မှန်သောချစ်ခြင်းမေတ္တာရှိခြင်း၊ 7 သမ္မာတရားကို ဟောပြောခြင်း၊ ဘုရားသခင်၏ တန်ခိုးတော်ကို ပြခြင်းတို့ဖြင့်လည်းကောင်း၊ လက်ဝဲ လက်ယာ၌ ကိုင်ဆောင်ထားသော ဖြောင့်မတ်ခြင်းလက်နက်များအားဖြင့်လည်းကောင်း၊ 8 ချီးမွမ်းခံရခြင်းနှင့် ကဲ့ရဲ့ခံရခြင်း၊ အကောင်းပြောခံရခြင်းနှင့် မကောင်းပြောခံရခြင်းအားဖြင့်လည်းကောင်း အရာရာတို့၌ ဘုရားသခင်၏ အစေခံများဖြစ်ကြောင်း ပေါ်လွင်စေကြ၏။ ကျွန်ုပ်တို့သည် လှည့်ဖြားသူများအဖြစ် သတ်မှတ်ခံရသော်လည်း ဖြောင့်မှန်သောသူများဖြစ်ကြ၏။ 9 တချို့သည် ကျွန်ုပ်တို့ကို တမန်တော်အဖြစ် အသိအမှတ်မပြုကြသော်လည်း ကျွန်ုပ်တို့သည် ထင်ပေါ်ကျော်ကြားသောသူများ ဖြစ်ကြ၏။ သေလူကဲ့သို့ဖြစ်သော်လည်း အသက်ရှင်ကြ၏။ ရိုက်နှက်ခံရသူများကဲ့သို့ဖြစ်သော်လည်း အသတ်မခံရကြ။ 10 ဝမ်းနည်းသောသူများကဲ့သို့ဖြစ်သော်လည်း အစဉ်အမြဲဝမ်းမြောက်ကြ၏။ ဆင်းရဲသောသူကဲ့သို့ဖြစ်သော်လည်း လူအမြောက်အမြားကို ချမ်းသာစေကြ၏။ မည်သည့်အရာမျှ မရှိသောသူကဲ့သို့ ဖြစ်သော်လည်း အရာအားလုံးကို ပိုင်ဆိုင်ကြ၏။
11 ကောရိန္သုမြို့သားတို့… ကျွန်ုပ်တို့သည် သင်တို့အား ပွင့်လင်းစွာ ပြောဆို၍ သင်တို့အပေါ်ထားသော ကျွန်ုပ်တို့၏မေတ္တာမှာလည်း ကြီးမားလှ၏။ 12 ကျွန်ုပ်တို့သည် သင်တို့အပေါ်ထားသော မေတ္တာတရားကို ကန့်သတ်ပိတ်ပင်ထားသည်မဟုတ်။ သင်တို့ကသာ ကျွန်ုပ်တို့အပေါ် ထားရမည့်မေတ္တာတရားကို ကန့်သတ်ပိတ်ပင်ထားခြင်းဖြစ်၏။ 13 သို့ဖြစ်၍ ပြန်လည်တုံ့ပြန်သောအနေဖြင့် “ကျွန်ုပ်တို့အပေါ်ထားသော သင်တို့၏မေတ္တာကိုလည်း ကြီးမားစေကြလော့” ဟု မိမိသားသမီးများကို ပြောသကဲ့သို့ ကျွန်ုပ်ပြောလို၏။
အသက်ရှင်တော်မူသောဘုရားသခင်၏ ဗိမာန်တော်
14 မယုံကြည်သောသူတို့နှင့် တွဲဖက်၍ မလုပ်ဆောင်ကြနှင့်။ ဖြောင့်မတ်သောသူနှင့် တရားမဲ့သောသူသည် မည်သို့ တွဲဖက်၍ လုပ်ဆောင်နိုင်မည်နည်း။ အလင်းနှင့် အမှောင်သည် မည်သို့ ဆက်စပ်ယှဉ်တွဲ၍ နေနိုင်မည်နည်း။ 15 ခရစ်တော်နှင့် နတ်ဆိုးဖြစ်သော ဗေလျာလaအကြား မည်သို့ သဘောတူညီမှုရှိနိုင်မည်နည်း။ ယုံကြည်သူနှင့် မယုံကြည်သူအကြား မည်သို့ အကျိုးတူခံစားနိုင်မည်နည်း။ 16 ဘုရားသခင်၏ ဗိမာန်တော်သည် ရုပ်တုတို့နှင့် မည်သို့ ပတ်သက်စပ်လျဉ်းမှုရှိမည်နည်း။ ဘုရားသခင်က
“ငါသည် သူတို့နှင့်အတူ နေထိုင်၍
သူတို့ထဲတွင် သွားလာမည်။
ငါသည် သူတို့၏ ဘုရားသခင်ဖြစ်၍
သူတို့သည်လည်း ငါ၏ လူမျိုးဖြစ်ကြလိမ့်မည်”
ဟု မိန့်တော်မူသည့်အတိုင်း ကျွန်ုပ်တို့သည် အသက်ရှင်တော်မူသောဘုရားသခင်၏ ဗိမာန်ဖြစ်ကြ၏။ 17 ထို့ကြောင့်
“သူတို့အထဲမှ ထွက်၍
သီးခြားနေကြလော့။
မစင်ကြယ်သောအရာကို မထိကြနှင့်။
သို့ပြုလျှင် ငါသည် သင်တို့ကို လက်ခံမည်။
18 ငါသည် သင်တို့၏ အဖဖြစ်မည်။
သင်တို့သည် ငါ၏ သားသမီးများဖြစ်ကြလိမ့်မည်”b
ဟု အနန္တတန်ခိုးရှင် ထာဝရဘုရားမိန့်တော်မူ၏။