ရောမ 13

အစိုးရမင်းများအား ပြုအပ်သောဝတ်

လူတိုင်း အစိုးရ၏ အမိန့်အာဏာကို နာခံကြရမည်။ အဘယ်ကြောင့်ဆိုသော် အာဏာဟူသမျှသည် ဘုရားသခင်ထံမှ လာသောကြောင့်ဖြစ်၏။ အုပ်စိုးလျက်ရှိသော အာဏာများသည် ဘုရားသခင် ခန့်ထားတော်မူသည့်အာဏာများ ဖြစ်၏။ 2 ထို့ကြောင့် အစိုးရအာဏာကို ဆန့်ကျင်သောသူတို့သည် ဘုရားသခင်၏ စီမံခန့်ခွဲတော်မူခြင်းကို ဆန့်ကျင်သောသူ ဖြစ်၏။ ထိုသူတို့သည် ပြစ်ဒဏ်ပေးခြင်းကို ခံရမည်။ 3 ကောင်းသောအကျင့်ကို ကျင့်သောသူများအတွက် အစိုးရမင်းများသည် ကြောက်စရာမဟုတ်။ ဆိုးသောအကျင့်ကို ကျင့်သောသူများအတွက်သာ ကြောက်စရာဖြစ်၏။ အစိုးရမင်းကို မကြောက်ဘဲ နေလိုလျှင် ကောင်းသောအကျင့်ကို ကျင့်လော့။ သို့ပြုလျှင် သူသည် သင့်ကို ချီးမွမ်းလိမ့်မည်။ 4 အစိုးရမင်းသည် သင်၏ အကျိုးအတွက် ခန့်ထားခံရသော ဘုရားသခင်၏ အစေခံဖြစ်၏။ သို့သော် သင်သည် မကောင်းမှုကို ပြုမိလျှင် သူ့ကို ကြောက်ရမည်။ အဘယ်ကြောင့်ဆိုသော် သူသည် သင့်အား အပြစ်ပေးပိုင်ခွင့် ရှိသောကြောင့်ဖြစ်၏။^a သူသည် ဘုရားသခင်၏ အစေခံဖြစ်၍ မကောင်းမှုကို ကျူးလွန်သောသူတို့ကို ပြစ်ဒဏ်ပေးမည့်သူ ဖြစ်၏။ 5 သို့ဖြစ်၍ ပြစ်ဒဏ်ကို ကြောက်သောကြောင့်သာ မဟုတ်ဘဲ မိမိအသိစိတ်ကြောင့်လည်း သူ၏အုပ်ချုပ်မှုကို နာခံရမည်။

6 ထိုအကြောင်းကြောင့် အခွန်ကိုလည်း ပေးဆောင်ကြလော့။ အဘယ်ကြောင့်ဆိုသော် အစိုးရမင်းတို့သည် အုပ်ချုပ်ရန် အချိန်ပြည့်တာဝန်ယူထားသော ဘုရားသခင်၏ အစေခံများဖြစ်သောကြောင့်ပင်။ 7 ပေးဆောင်ထိုက်သည်ကို ပေးဆောင်ကြလော့။ အခွန်ဆောင်စရာရှိလျှင် ပေးဆောင်ကြလော့။ အကောက်ဆောင်စရာရှိလျှင် ပေးဆောင်ကြလော့။ ကြောက်ရွံ့ထိုက်သူကို ကြောက်ရွံ့၍ ရိုသေထိုက်သူကို ရိုသေကြလော့။

ဘုရားသခင်၏ ပညတ်တော်တို့ကို ပြည့်စုံစေသော ချစ်ခြင်းမေတ္တာ

8 အချင်းချင်း မေတ္တာကြွေးမှလွဲ၍ မည်သည့် အကြွေးမျှ မတင်စေကြနှင့်။ သူတစ်ပါးကို ချစ်သောသူသည် ပညတ်တရားကို အပြည့်အဝလိုက်နာသူ ဖြစ်၏။ 9 အဘယ်ကြောင့်ဆိုသော် “သူတစ်ပါးသားမယားကို မပြစ်မှားနှင့်။ လူ့အသက်ကို မသတ်နှင့်။ မခိုးယူနှင့်။ မမှန်သောသက်သေကို မထွက်ဆိုနှင့်။ သူတစ်ပါးဥစ္စာကို မတပ်မက်နှင့်” ဟူသော ပညတ်ချက်များနှင့် အခြားပညတ်တို့၏ အနှစ်ချုပ်မှာ “ကိုယ်နှင့် သက်ဆိုင်သောသူကို ကိုယ်နှင့်အမျှ ချစ်လော့” ဟူသည့် ပညတ်ဖြစ်သောကြောင့် ဖြစ်၏။ 10 ချစ်ခြင်းမေတ္တာသည် ကိုယ်နှင့် သက်ဆိုင်သောသူတို့အား အကျိုးမယုတ်စေပါ။ ထို့ကြောင့် ချစ်ခြင်းမေတ္တာသည် ဘုရားသခင်၏ ပညတ်တော်ကို ပြည့်စုံစေ၏။

11 သင်တို့သည် ယခုလက်ရှိ အချိန်အခါကို နားလည်ကြ၏။ သင်တို့ အိပ်ပျော်ရာမှ နိုးထရမည့်အချိန် ရောက်ပြီ။ အဘယ်ကြောင့်ဆိုသော် ကျွန်ုပ်တို့ ကယ်တင်ခံရမည့် အချိန်သည် ကျွန်ုပ်တို့ စတင်ယုံကြည်ခဲ့သည့် အချိန်ကထက် ပို၍ နီးကပ်လာသောကြောင့် ဖြစ်၏။ 12 ညအချိန် ကုန်ဆုံးတော့မည်ဖြစ်ပြီး နေ့အချိန်သည် နီးကပ်လာပြီ။ ထို့ကြောင့် ကျွန်ုပ်တို့သည် အမှောင်၌ ပြုသောအကျင့်များကို ဖယ်ရှား၍ အလင်း၏ လက်နက်များကို ကိုင်ဆောင်ကြရမည်။ 13 နေ့အချိန်၌ ပြုမူနေထိုင်သကဲ့သို့ သင့်တင့်လျောက်ပတ်စွာ ပြုမူနေထိုင်ကြရမည်။ အပျော်ကြူးခြင်း၊ သောက်စားမူးယစ်ခြင်း၊ ကာမဂုဏ်လိုက်စားခြင်း၊ ကိလေသာလွန်ကြူးခြင်း၊ ခိုက်ရန်ဖြစ်ခြင်းနှင့် မနာလိုခြင်းတို့ကို ရှောင်ကြဉ်ရမည်။ 14 သခင်ယေရှုခရစ်တော်ကဲ့သို့ ကျင့်ကြံပြုမူကြလော့။^b လူ့ဗီဇစိတ်^cအလိုကို လိုက်ရန် မကြံစည်ကြနှင့်။