ဆုတောင်းပေးရန် မေတ္တာရပ်ခံခြင်း
3
ညီအစ်ကိုမောင်နှမတို့… နိဂုံးချုပ်အနေဖြင့် ကျွန်ုပ်မှာကြားလို၏။ သခင်ဘုရား၏ နှုတ်ကပတ်တရားတော်သည် အရပ်ရပ်သို့ လျင်မြန်စွာ ပြန့်ပွား၍ သင်တို့သည် ထိုနှုတ်ကပတ်တရားတော်ကို ရိုသေလက်ခံသကဲ့သို့ အခြားသူတို့လည်း ရိုသေလက်ခံရန် ဆုတောင်းပေးကြလော့။ 2 လူတိုင်းသည် ခရစ်တော်ကို ယုံကြည်သည် မဟုတ်သောကြောင့် ဘုရားသခင်သည် ကျွန်ုပ်တို့ကို ယုတ်မာဆိုးညစ်သူတို့လက်က ကယ်တင်ပေးတော်မူရန် ဆုတောင်းပေးကြလော့။ 3 သို့ရာတွင် သခင်ဘုရားသည် သစ္စာရှိသောအရှင် ဖြစ်တော်မူသည်နှင့်အညီ သင်တို့ကို ကြံ့ခိုင်စေ၍ မာရ်နတ်ထံက ကာကွယ်ပေးတော်မူလိမ့်မည်။ 4 သင်တို့သည် ကျွန်ုပ်တို့၏ ညွှန်ကြားချက်များကို ယခု လုပ်ဆောင်နေသကဲ့သို့ ဆက်၍လည်း လုပ်ဆောင်မည်ဟု သခင်ဘုရားက ကျွန်ုပ်တို့ကို ယုံကြည်စိတ်ချစေတော်မူ၏။ 5 ဘုရားသခင်၏ ချစ်ခြင်းမေတ္တာကို သင်တို့နားလည်သဘောပေါက်စေရန်နှင့် ခရစ်တော်ကဲ့သို့ သည်းခံတတ်စေရန် သခင်ဘုရားသည် သင်တို့aကို လမ်းညွှန်တော်မူပါစေသော။ပျင်းရိသူ မဖြစ်ရန် သတိပေးခြင်း
6 ညီအစ်ကိုမောင်နှမတို့… ကျွန်ုပ်တို့ သွန်သင်ခဲ့သည့် ဓလေ့ထုံးတမ်းအတိုင်း မလိုက်နာဘဲ ပျင်းရိလေလွင့်နေသော ယုံကြည်သူတို့နှင့် မပေါင်းဖော်ရန် ယေရှုခရစ်တော်၏ အခွင့်အာဏာဖြင့် ကျွန်ုပ်တို့သည် သင်တို့ကို ညွှန်ကြားလိုက်ပါ၏။ 7 ကျွန်ုပ်တို့၏ စံနမူနာကို သင်တို့မည်သို့ ယူသင့်သည်ကို သိကြ၏။ ကျွန်ုပ်တို့သည် သင်တို့နှင့် အတူနေထိုင်စဉ်က ပျင်းရိလေလွင့်၍ မနေခဲ့ကြ။ 8 ကျွန်ုပ်တို့သည် အဖိုးအခမပေးဘဲ မည်သူတစ်ဦးတစ်ယောက်၏ အစားအစာကိုမျှ မစားခဲ့ကြ။ သင်တို့တစ်ဦးတစ်ယောက်ကိုမျှ ကျွန်ုပ်တို့ကြောင့် ဝန်ထုပ်ဝန်ပိုး မဖြစ်စေရန် နေ့ရောညပါ ကြိုးစား၍ အလုပ်လုပ်ခဲ့ကြ၏။ 9 ထိုသို့ လုပ်ရခြင်းသည် ကျွန်ုပ်တို့တွင် သင်တို့ထံက အကူအညီကို ရပိုင်ခွင့်မရှိသောကြောင့် မဟုတ်။ ကျွန်ုပ်တို့ထံက သင်တို့ယူစရာ စံနမူနာ ရှိစေလိုသောကြောင့် ဖြစ်၏။ 10 သင်တို့နှင့် အတူရှိစဉ်က “အလုပ်မလုပ်လိုသောသူကို အစားအစာလည်း မစားစေနှင့်” ဟု ကျွန်ုပ်တို့ ညွှန်ကြားခဲ့၏။
11 သို့သော်လည်း သင်တို့ထဲတွင် တချို့သည် ပျင်းရိလေလွင့်နေ၍ အလုပ်မလုပ်ဘဲ သူတစ်ပါး ကိစ္စများတွင် ဝင်ရောက်စွက်ဖက်နေကြောင်း ကျွန်ုပ်တို့ ကြားရ၏။ 12 ကျွန်ုပ်တို့သည် ထိုကဲ့သို့သောလူများကို မိမိဝမ်းစာအတွက် မိမိကိုယ်တိုင် အေးချမ်းစွာ ကြိုးစားရှာဖွေရန် သခင်ယေရှုခရစ်တော်၏ အခွင့်အာဏာဖြင့် ညွှန်ကြားကာ တိုက်တွန်းနှိုးဆော်ကြ၏။ 13 ညီအစ်ကိုမောင်နှမတို့… ကောင်းမှုပြုရန် စိတ်မပျက် အားမလျှော့ကြနှင့်။
14 တစ်စုံတစ်ယောက်သည် ဤစာတွင် ပါသော ညွှန်ကြားချက်များကို နားမထောင်လျှင် ထိုသူကို အရှက်ရစေရန် မှတ်သားထား၍ ထိုသူနှင့် မပေါင်းဖော်ကြနှင့်။ 15 သို့သော်လည်း ထိုသူကို ရန်သူအဖြစ် သဘောမထားဘဲ ယုံကြည်သူချင်း ကဲ့သို့ သတိပေးကြလော့။
နိဂုံးချုပ်စကား
16 ငြိမ်းချမ်းခြင်းအရှင် သခင်ဘုရား ကိုယ်တော်တိုင်သည် သင်တို့ကို နည်းအမျိုးမျိုးဖြင့် ငြိမ်းချမ်းခြင်းကို အစဉ်ပေးတော်မူပါစေသော။ သခင်ဘုရားသည် သင်တို့အားလုံးနှင့်အတူ ရှိပါစေသော။
17 ကျွန်ုပ်ပေါလုကိုယ်တိုင် ဤနှုတ်ဆက်စကားကို မိမိလက်နှင့် ရေးလိုက်ပါ၏။ ၎င်းသည် ကျွန်ုပ်၏ စာတိုင်းတွင် ပါသည့် အမှတ်အသားဖြစ်၏။ ဤသို့ ကျွန်ုပ် ရေးလေ့ရှိ၏။ 18 ကျွန်ုပ်တို့ သခင်ယေရှုခရစ်တော်၏ ကျေးဇူးတော်သည် သင်တို့အားလုံးနှင့်အတူ ရှိပါစေသော။
သက်သာလောနိတ်ဩဝါဒစာ ဒုတိယစောင် ပြီးပါပြီ။